Настани

Марија Малгожата Мачковска добитник на наградата Рицерски крст - Орден за заслуги на Р. Полска

PDFПечатиЕ-пошта

( 0 Гласа )

На ден 18.11.2021 година нашата драга колешка Марија Малгожата Мачковска, вработена во НУУБ „Св.Климент Охридски“ - Битола ја доби престижната награда „Рицерски крст - Орден за заслуги на Р.Полска“ од претседателот на Р. Полска Анджеј Дуда.
Оваа престижна награда се доделува уште од 1923 година на лица кои и дале заслуга на државата или на граѓаните со извршување на дела што го надминуваат опсегот на нивните вообичаени должности, кои носат значителна корист за државата или граѓаните, јавна посветеност и добротворни цели.

„Секогаш ме исполнува со гордост кога слушам дека моите сонародници придонесуваат за градење на просперитетот на другите земји, за нивниот развој“ - рече претседателот на Полска Анджеј Дуда.
Малгожата Мачковска е претседател на огранокот на Друштво за македонско - полско пријателство и соработка „Висла“.
Таа е креатор, организaтор на традиционалниот концерт „Шопенова вечер“ кој се одржува веќе 28 години во општина Битола со соработка со Државно музичко училиште - Битола и Амбасада на Р. Полска во Скопје, организатор на разни културни манифестации, популаризатор на полската култура во нашата држава, како  и иницијатор на културна соработка помеѓу двете држави.

Повеќе фотографии од овој настан на нашата web страница: NUUB Facebook

 

 

 

Најубавите животни приказни усно пренесени од нашите баби и дедовци

PDFПечатиЕ-пошта

( 0 Гласа )

Секоја генерација носи свои животни приказни. Времето толку брзо ги менува условите, што дел од тие традиции и начин на живот на нашите предци полека исчезнува. Векови наназад  овие традиции се пренесуваат усно или материјално од генерација на генерација, се со цел дел од нив да бидат зачувани и пренесени на наредните генерации.
По тој повод, во НУУБ „Св. Климент Охридски“-Битола се одржа една прекрасна работилница во која учество зедоа бабите и дедовците на  учениците од III-в одделение од ООУ „Даме Груев“- Битола, кои со својата наставничка Марина Божиновска беа дел од ова патување низ времето.
Од почитуваните гости,  баба Тодорка Василевска не запозна со народните носии: прекрасни фустани, грклани, појаси, накит и  украси, кои ги носеле жените пред еден век. Толку педантно зачувани и спремни да се пренесат на наредните генерации. Со толку восхит им раскажуваше баба Тодорка на учениците, за начинот на кој целата облека се изработувала рачно, како од волната преку рачна изработка се до добивањето на тие прекрасни алишта.
Баба Вера Пејчиновска пак ни раскажа како порано се добивало брашното. Од самото сеењето на житото, па неговото жнеење и врав (вршење со коњите во гумно) процес кога се делат зрната од житото, од кои понатаму се прави брашно, а од остатокот слама која ја користеле во зимата за хранење на стоката.  
Дедо Гоце Пачовски, ни раскажуваше како е да се биде ученик во негово време. Тој дури се сеќаваше и на првата песничка „ Брзај, брзај прваче...“ која ја научил кога тргнал на училиште. Раскажуваше за почитта кон наставникот и за правилата по кој учеле во негово време. За методите на наставниците кон воспитувањето на децата.  
Баба Дона Цветковска ни зборуваше пак за приготвувањето на здрава храна. Како порано луѓето морале сами да си подготват се, будејќи не можело да се купи. Ни раскажа за подготвувањето на палентата, или тогашниот специјалитет бакрданик кој често го подготвувале домаќинките. Како и подготовка на матеница (маштеница) од млекото во дрвен сат кој се вика бутим.
Баба Оливера Радевска на овие прекрасни дечиња им раскажа како се прават традиционалните јадења како што е зелник и мазник кои сеуште ги прават за своите внучиња. Сите овие техники и рецепти биле усно и писмено пренесувани со генерации, а што е карактеристично дека секоја куќа, односно домаќинка си имала свои техники поразлични од другите.
НУУБ „Св. Климент Охридски“- Битола како благодарност на овие прекрасни гости им поклони по една книга, а учениците имаа можност да ја разгледаат нашата библиотека и да видат дека и библиотеката има свој музеј во кој го чува националното богатство, односно спомените од рачното работење.  
Подготвил: м-р Гордана Ѓоргиевска-Неделковски

Повеќе фотографии од овој настан на следниот линк: NUUB Facebook

 

 

   

Кафе и книги со наши локални писатели

PDFПечатиЕ-пошта

( 1 Глас )

Кога есента ќе не изненади со своето топло време, ние тоа ќе го искористиме за дружба, кафе и прекрасен разговор со еден млад писател. Овој пат НУУБ „Св. Климент Охридски“- Битола беше на кафе со Влатко Стојковски. Тој е професор по македонски јазик во основното училиште „Браќа Миладиновци“ во село Жван-Демир Хисар, но воедно и млад писател кој ни го промовира своето прво дело „Записите на учителот“.

Разговорот го започнавме со прашањето која му се јавила љубовта кон пишаниот збор, а тој за своите почетоци ни раскажа една прекрасна приказна:„ Почнав да пишувам уште многу мал, може да се рече од самото описменување. Голем поттик имав и од наставникот по македонски јазик додека бев основно училиште. Дел од моите творби се објавуваа на различни конкурси во училиштето. За жал, кога дојдов во средно, сето тоа се смени. Некако ми се јави одбивност кон пишувањето, за години покасно повторно да почнам да пишувам.“ Неговата љубов кон пишувањето станува се поголема паралелно со неговото работење како наставник.

Досега неговото пишување повеќе беше насочено кон кратко раскази, поезија и есеи за потребата на својата работа како наставник. Но, негово прво дело кое секако на посебен начин го истакнува неговиот стил на пишување е делото „ Записите на учителот“. Оваа збирка е составена од кратки раскази посветени на случки и личности кои оставија белег во минатото, но истовремено влијаат и на иднината со својата поучна приказна. Животните лекции се најдоброто нешто што може да ни ја смени насоката по која се движиме во иднина, да не ни дозволи да ги повториме истите или барем да научиме нешто од нив.

Влатко е наставник кој вложува многу во пишаниот збор. Иако е на самите почетоци, мотивот кој го движи му ги отвора вратите. Покрај наставник тој работи и како онлајн соработник за онлајн продажба на книги од „Македоника литера“. Во својата биографија му се запишуваат и преводите на неколку книги за тинејџери од англиски на македонски јазик:„ Братучед ми доаѓа“, „Вкусот на сонцето“ и „Лисицата трговец“.

Во моментов тој работи на дигитализација на својата книга „Записите на учителот“, за ова тој ни кажа:„ Веќе сум во преговори за снимање на расказите од оваа книга во дигитална форма, се со цел да биде подостапна за сите категории на читатели“.

Пријатното есенско сонце и шумолот на лисјата кои паѓаа во нашиот прекрасен парк, направија овој разговор да течи во посебна хармонија, но за крај ние овој разговор го завршивме со најава за наредна соработка и со моќна порака до нашите читатели: „ Поминувајте време со книга затоа што таа е добра можност да се оттргнете од сивилото на секојдневието и да ги исполните духовните батерии. Шетајте во природа, поминувајте време со ближните и секогаш најдете можност да помогнете некому“.

   

Страница 4 од 303

Сподели на Facebook