На 27.08.2025 година, во НУУБ „Св. Климент Охридски“ – Битола се реализира последната работилница од проектот „Библиотерапија, терапија со поезија и антистрес терапија“. За учесниците беа подготвени три интересни и креативни вежби од психологот Наташа Бекирова, како продолжение на претходниот настан. Работилницата започна со прекрасни мотивирачки мисли од книги, кои длабоко го одразија карактерот и животните искуства на присутните:
• „Секое искуство, секој миг е патот кон вистината“ – Херман Хесе
• „Човек мора да живее, а не само да постои“ – Антон Чехов
И уште многу други мудри зборови, кои по некое чудо се најдоа во вистинските раце, што го направи почетокот особено инспиративен. Потоа следеше активноста „Книгата ме научи“, во која секој од присутните запиша извадоци од книги кои оставиле трага врз нив. Од „Зоки Поки“, па сè до „Икигаи“, имавме можност да слушнеме навистина поучни и инспиративни цитати.
За крај, секој учесник одговори на предизвикот: „Ако мојот живот беше книга ќе се викаше…“ Драги читатели, дали некогаш сте се запрашале – како и од кои книги сте научиле нешто? И ако вашиот живот беше книга, кој би бил нејзиниот наслов?
Слободно споделете со нас во коментарите. Продолжуваме заедно да ја живееме библиотерапијата – да ги замениме лековите со добра книга и убава мисла. Овој проект е поддржан од Министерство за култура и туризам на РС Македонија.
Координатори: м-р Гордана Ѓоргиевска-Неделковски м-р Фатма Бајрам Аземовска
Повеќе фотографии на следниот линк: NUUB Facebook