Во дневната соба на НУУБ „Св. Климент Охридски“ – Битола, денес се одржа третата работилница од проектот „Библиотерапија, терапија со поезија и антистрес терапија“, кој е поддржан од Министерството за култура и туризам на РС Македонија.
Работилницата ја предводеше Наташа Бекирова, дипломиран психолог, системски и семеен советник под супервизија, која оваа средба ја насочи кон сеќавање на книгите што придонеле за нашето лично обликување. Секој учесник имаше можност да зборува за книгата што ја памети како највлијателна во одреден период од својот живот. Така во оваа работилница се обидовме да ги препознаеме „светлините на патот“ – книгите што оставиле трајна трага во нашиот живот и кои нè обликувале како личности.
Секој од нас има своја животна патека исполнета со предизвици, радости, падови и подеми. На тој пат често сме биле придружувани од книги – тивки пријатели кои ни дале утеха, надеж, сила или мудрост. Некои книги нè научиле да гледаме подлабоко во себе, други нè инспирирале да сонураме поголеми соништа, а трети ни помогнале да го пронајдеме вистинскиот правец кога сме се чувствувале изгубени.
Пред присутните се обрати и директорката на библиотеката, м-р Емилија Стефановска-Давкова, која истакна:
„Нашата цел е не само да се потсетиме на делата што нè обликувале, туку и да откриеме како тие книги сè уште живеат во нас – во нашите избори, мисли и соништа. Библиотеката е место во кое секој може да го пронајде својот мир, својот бесплатен лек.“
Координатори на проектот:
м-р Гордана Ѓоргиевска Неделковски, виш библиотекар
м-р Фатма Бајрам Аземовска, раководител на сектор, библиотекар советник
Повеќе фотографии на следниот линк: NUUB Facebook