Од Битола до Европа – кога информацијата може да биде првиот чекор кон ново искуство!
Уште една инспиративна и практична средба во рамките на програмата „Курсеви за личен и професионален развој – Инвестирај во себе“ успешно се реализираше во НУУБ „Св. Климент Охридски“ – Битола.
Овојпат темата ја избраа самите млади. На претходните работилници тие изразија желба да дознаат повеќе за Еразмус+, можностите за патување, младинските размени, учењето и личната надградба. Ние ги слушнавме – и токму од нивниот интерес произлезе работилницата:
„Од Битола до Европа: ЕРАЗМУС+ – можности за учење, патување и личен развој“
Предавач на средбата беше Викторија Михајловска, која на учениците, средношколците и студентите им ги доближи можностите што Еразмус+ ги нуди за младите.
Преку интерактивен разговор, практични информации и споделување искуства, учесниците имаа можност да дознаат повеќе за младинските размени и меѓународните активности, каде да ги бараат можностите, како да се информираат и како да го направат првиот чекор кон едно ново европско искуство.
Разговаравме и за она што го носи едно вакво патување, а не може да се измери само во километри – нови знаења, пријателства, запознавање различни култури, поголема самостојност, самодоверба и искуства што остануваат за цел живот.
Особено не радува интересот на младите, нивните прашања и желбата да откриваат нови можности. Токму тоа е и една од целите на програмата „Инвестирај во себе“ – да не им кажуваме на младите само што треба да знаат, туку и да ги слушаме што тие сакаат да научат.
Благодарност до Викторија Михајловска за споделеното знаење, искуство и практичните насоки, а најголема благодарност до младите кои со својата љубопитност и активно учество ѝ дадоа вистинска вредност на средбата.
Програмата се реализира од НУУБ „Св. Климент Охридски“ – Битола, со поддршка од Министерството за култура и туризам.
Инвестирај во себе. Прашај. Истражувај. Аплицирај. Патувај. Учи. Расти.
Затоа што понекогаш едно прашање, една информација или една апликација може да биде почеток на искуство што ќе ви го промени погледот кон светот.
Повеќе фотографии на следниот линк: NUUB Facebook